Ku mugwa mukuru wa Comine Rumonge mu ntara ya Burunga, Ubushikiranganji itariki y'7 Mukakaro 2026 bw'ubutare, amasoko ntanganguvu, amahinguriro, ubudandaji n'ingenzi buciye mu mugambi wabwo ariwo Mugambi w’ukworosha urudandandaza njabukambibe n’iyinjizwa mu karere k’ibiyaga binini (PFCIGL) ufashwe mu mugongo n'ibanki y'isi yose bwaratunganije inama yo guhimiriza ku ngingo ngenderwako zokwitwararika Abadandaza bato bato njabuka imbibe.
izo ngingo ngo zashizweho kugira hatezwe imbere abadandaza njabukambibe mu kubamenyesha uburenganzira n'ibitegerezwa kwubahirizwa; haba kubadandaza canke abakozi bo ku mbibe.
Ibiganiro vyashikirijwe vyari bishimikiye ku nkomoko y'izo ngingo, ivyo abadandaza bato bato njabukambibe, abadandaza bagendana ubumuga, n'abakozi bakorera kumbibe bategerezwa kwubahiriza nivyo bafitiyeko uburenganzira.
Mw'ijambo ryiwe, uwaserukiye ubushikiranganji mu vyo bujejwe harimwo ubudandaji n'ingenzi, Pacifique Nshimirimana yamenyesheje ko urudandaza njabukambibe ahanini rukorwa kenshi n'abakenyezi hamwe n'urwaruka. Ku bw'ivyo, isoko rusangi COMESA ribonye abadandaza bato bato njabukambibe bagira ingorane ryaciye rishiraho ingingo ngenderwako zokwitwararika abo badandaza. Ati : « Izo ngingo zirasaba ko ihanahana ry’ibidandazwa bica ku mbibe riba mu muco kandi ryitaho ibibazo bijanye n’umukenyezi-mudandaza. Izo ngingo zisaba kandi ko abadandaza n’abakozi b’ibisata bikorera ku mipaka bahindura ingendo, kugira urudandaza njabukambibe rukorwe neza ata nkomanzi ». yarongeye aramenyesha ko iyo nama yatunganijwe mu gihe Leta y’Uburundi, biciye ku mugambi PFCIGL, iriko irakora utwigoro dushoboka kugira ikurikirane yongere ifate mu mugongo abadandaza bato bato njabukambibe kugira baze bakore neza kandi bunguka, bateze imbere imiryango yabo, eka n’igihugu cacu.
Ku bw’umufasoni Consolate Sibomana ajejwe urudandaza mugihugu hagati yarasiguriye abo badandaza ku vyerekeye uburenganzira nibitegerezwa kwisungwa nshingiro vy'abadandaza n'abakozi bo kumbibe.
Abo badandaza nabo baciye bashikiriza ivyiyumviro bafise kuvyerekeye ishirwamungiro ryayo. Ni na co gituma uwaserukiye umuhuzabikorwa w' umugambi w’ukworosha urudandaza njabukambibe n'iyinjizwa mukarere k'ibiyaga binini (PFCI GL), Marie Rose SINAMENYE yavuze ko uwo Mugambi uzofasha gushira mungiro ibikenewe mukugabanya uburyo n'umwanya umudandaza akoresha mukujabuka urubibe.
Ati uyo mugambi ushigikiye urukurikirane rw’ingingo zagenewe kworohereza abadandaza bato bato mu kurengana urubibe. Yarongeye ashikirizako izo ngingo zijanye n’itangwa ry’ amakori, kurengana ku mbibe, kuraba ubuziranenge bw’ibidandazwa, n’ugukorana neza hagati y’abakorera ku mbibe.
Ati ishirwa mu ngiro ry’uwu Mugambi ku bijanye n’uwo muce, rishimikiye ku ngingo zamaze gushigwaho ku rwego rwa COMESA zirimwo n’Uburyo bwo kworosha urudandazwa (RECOS) bwa COMESA mu kworosha itangwa ry’amakori ku mbibe ku bidandazwa bito bito biri ku rutonde rwumvikanweko hagati y’Uburundi na Repubulika iharanira Demokarasi ya Kongo.
Kuvyerekeye uburyo bwokorosha urudandaza njabuka mbibe Nininahazwe Joselyne ari mu badandaza bashimye izo nyigisho aravuga yuko bagiye kuronka akarusho mugihe izo ngingo zoshirwa mungiro. Uyo mudandaza aremeza ko yatahuye inyigisho yaronse. Ati naramenye ko umudandaza afise uburenganzira bukwiye bwo kurenganana ibidandazwa vyiwe ku mupaka mu mwidegemvyo ntangere mu gihe afise inyandiko zisabwa zose harimwo. Ati ati izo ngingo zizotuma umudandaza mutomuto adakubagurwa. Ivyo gukorera mu binywabi ati bigiye guhera umudandaza akorere ku mugaragaro kuko azoba afise ibimuranga vyose. Nininahazwe arahamagarira abadandaza kwijukira amashirahamwe kuko baharonkera inyigisho nyinshi zituma bakora umuwuga wabo neza. Aranashimira umuganmbi PFCIGL ngo wabakuye mu buzimire bwinshi harimwo gukorera mu binywabi kandi bahurira yo n’ingorane nyinshi zirimwo ifatwa ry’ibidandazwa, n’ugufatwa ku nguvu.
Uwundi mudandaza, Estherine Ndihokubwayo wo muRumonge nawe nyene aremeza ko yamenyeye vyinshi muri izo nyigisho.Ati naramenye ko ntazorenza umutahe wa dolari 500, ati ntegerezwa kujabuka mfise ivyangombwa vyose nka NIF, urupapuraro rw’inzira, amafagitire , karangamuntu, n’urupapuro rw’amamuko y’ibidandazwa.
Mwomenyako umugambi PFCIGL ugizwe n’imice 4: gutunganya neza amategeko agenga urudandaza njabukambibe, guteza imbere inyubako z'ubudandaji nshingiro, gushigikira ibikorwa vy'ubudandaji vy'urukwirikirane rw'intumbero zose zatowe zishobora gituma ibidandanzwa biboneka, gushigikira ishirwamungiro hamwe no gukurikirana no gusuzuma ibikorwa vy'uwo mugambi.
PFCIGL yaramenyesheje muri iyo nama ko inyubako zimwe zimwe zatanguye kubakwa , izo nazo ni nkizo kumupaka wa Gatumba , ibarabara riva mugatumba rija k'umupaka w'ivugizo, n' umupaka w'i Vugizo nyene. Mbere n'amasezerano yo kubaka ikivuko ca Rumonge akaba yimirije gushirwako umukono.
